რა უნდა გააკეთოთ თუ ლიფტში გაიჭედეთ

ლიფტი ჩვენი ყოველდღიურობის განუყოფელი ნაწილია, თუმცა ზოგჯერ დენის გათიშვის, ანდა სხვა მიზეზების გამო ლიფტი ჩერდება და ვინც ერთხელ მაინც გაჭედილა ლიფტში, იქნება ეს ძველი საბჭოთა დროის, თუ ახალი, ბუნებრივია პანიკის გრძნობა დაეუფლებოდა.

მიუხედავად იმისა, რომ ბუნებრივია პანიკის გრძნობა როცა ლიფტში ხარ გაჭედილი, მნიშვნელოვანია სიმშვიდე შეინარჩუნოთ და მიიღოთ შესაბამისი ზომები. ამ ბლოგ-პოსტში წარმოგიდგენთ რამდენიმე პრაქტიკულ ნაბიჯს, რათა დაიცვათ თქვენი უსაფრთხოება და კომფორტის გრძნობა ტექნიკური დახმარების მოსვლამდე.

თუმცა, სანამ რჩევებზე და რეკომენდაციებზე გადავიდოდეთ, ვთვლით საჭიროა იცოდეთ საქართველოში არსებული რეგლამენტი ლიფტების უსაფრთხოებასთან დაკავშირებით, რომელიც 2013 წელს დამტკიცდა და ის ლიფტის მფლობელ კომპანიებს კონკრეტულ ვალდებულებებს აკისრებს:

ლიფტის მფლობელი, საცხოვრებელი კორპუსების შემთხვევაში – ბინათმესაკუთრეთა ამხანაგობა ვალდებულია უზრუნველყოს ლიფტის პერიოდული ტექნიკური ინსპექტირება ყოველ მესამე წელს.

ლიფტი წარმოადგენს ბინათმესაკუთრეთა ამხანაგობის წევრთა საერთო ქონებას. ამხანაგობა ვალდებულია 3 წელიწადში ერთხელ ჩაუტაროს ლიფტს ტექნიკური ინსპექტირება. თუ ინსპექტირების შედეგად გამოვლინდა, რომ ლიფტი ვერ აკმაყოფილებს კანონმდებლობის მოთხოვნებს და საჭიროებს სარემონტო სამუშაოს, ბინათმესაკუთრეთა ამხანაგობას შეუძლია ისარგებლოს თბილისის მერიის რაიონების ,,ბინათმესაკუთრეთა ამხანაგობების განვითარების ხელშეწყობის პროგრამით“.

ამისათვის საჭიროა, რომ ბინათმესაკუთრეთა ამხანაგობამ განცხადებით უნდა მიმართოს შესაბამის რაიონულ გამგეობას (განცხადებას თან უნდა ერთვოდეს აკრედიტირებული ორგანოს ექსპერტიზის დასკვნა)

გამგეობა მიიღებს გადაწყვეტილებას აკრედიტირებული ორგანოს ექსპერტიზის დასკვნის, ამხანაგობის პრიორიტეტებისა და არსებული საბიუჯეტო სახსრების გათვალისწინებით.

დამატებითი ინფორმაციისთვის შეგიძლიათ მიმართოთ  შესაბამის რაიონულ გამგეობას.

თუ ლიფტში გაიჭედეთ:

• ღრმად ისუნთქეთ და დამშვიდდით. ნერვიულობა მხოლოდ ხელს შეგიშლით საღად აზროვნებაში, არ აჰყვეთ პანიკას და ლიფტში მითითებულ emergency ნომერზე დარეკეთ
• არ ეცადოთ დამოუკიდებლად გამოღწევას ლიფტიდან. შეიძლება ლიფტი ბაქანთან სულაც არ იყოს ახლოს და ამით შახტაში ჩავარდნის რისკებს გაზრდით.
• ნუ დაარტყამთ ფეხს კარებს. მკვეთრი მოძრაობებისგან თავი შეიკავეთ და არასდროს იხტუნოთ ლიფტში.
• ეცადეთ, ვინმეს დაუკავშირდეთ. ზოგიერთ თანამედროვე ლიფტს ტექნიკური პერსონალი ემსახურება. თუ ეს ასე არაა, უბრალოდ დაუკავშირდით ვინმეს მობილურით. იმედია, ისე არ მოხდება, რომ მობილურიც დამჯდარი გქონდეთ.
• ნუ იქნებით გმირი. თუ თქვენს გვერდზე მდგომი პანიკაშია არ ეცადოთ რამე მოიმოქმედოთ გამოსასვლელად, რადგან შეიძლება შეცდომა მოგივიდეთ, ამის მაგივრად ეცადეთ თქვენს გვერდზე მდგომი დაამშვიდოთ და დაელოდოთ პროფესიონალს. ეს პროფესიონალებსაც დაეხმარებათ რომ უფრო მარტივად გამოგიყვანოთ
• თუ ლიფტი სავსეა მგზავრებით, უმჯობესი იქნება თუ დაელოდებით შემდეგ ლიფტს.
• არასდროს დააჭიროთ ყველა ღილაკს ერთად.
• არასდროს მიაწვეთ ლიფტის კარებს.
• ხანძრის შემთხვევაში არ გამოიყენოთ ლიფტი

თუ ფიქრობთ, რომ თქვენს შენობაში განთავსებული ლიფტი სახიფათოა, შეგიძლიათ მიმართოთ თქვენი ლიფტის კომპანიას ან – ძველი ლიფტის შემთხვევაში – თბილისის მერიას.